Շահառուների կողմից հաճախ տրվող հարցեր

1. Ինչպիսի՞ն է դիմումի ընթացակարգը։

Շահառուն դիմում և փաստաթղթեր է ներկայացնում մարզպետարան կամ Երևան քաղաքում՝ թաղապետարան։ Ձևավորվում է փաթեթ, որն ուղարկվում է Պաշտպանության նախարարություն։ ՊՆ-ն փաստաթղթերի փաթեթը հաստատելուց հետո փոխանցում է Զինծառայողների ապահովագրության» հիմնադրամին։ Փաթեթը ստանալուց հետո, Հիմնադրամը կատարում է հատուցում։ Փորձից ելնելով, կարող ենք ասել, որ ամբողջ գործընթացը միջինում տևում է 2-3 շաբաթ, բայց քանի որ դիմումները շատ են,  որոշ դեպքերում գործընթացը կարող է ավելի երկար տևել:

 2. Ուզում ենք իմանալ` ի՞նչ փուլում է մեր փաստաթղթային փաթեթը։

Փաստաթղթային փաթեթների ընթացքի վերաբերյալ տեղեկատվություն կարող եք ստանալ Պաշտպանության նախարարությունից։ 

3. Ո՞ր բանկերից են իրականացվում վճարումները։

Մենք համագործակցում ենք

1. Կոնվերսբանկի
2. Արցախբանկի
3. Հայբիզնեսբանկի հետ

Հաշիվը բացվում է շահառուի բնակության հասցեին առավել մոտ գտնվող բանկի մասնաճյուղում։ Բանկի ընտրությունը կատարում է հիմնադրամը, եթե շահառուներն ունեն այլ հաշիվ, ապա այդ հաշվին փոխանցում չի կատարվում։ Բացված հաշիվը հատուկ հաշիվ է, որի վրա առկա միջոցներն անձեռնմխելի են, այսինքն չեն կարող, օրինակ, բռնագանձվել ԴԱՀԿ-ի կողմից։

4. Որտե՞ղ է պետք հանձնել փաստաթղթային փաթեթը։

Փաստաթղթերը պետք է հանձնել.

1. Մարզերում՝ մարզպետարանների իրավաբանական վարչություններ,
2. Երևան քաղաքում՝ թաղապետարանների իրավաբանական վարչություններ,
3. Արցախում՝ Պաշտպանության բանակի Սոցիալական վարչություն։

Փաստաթղթային փաթեթը հավաքելու, ամբողջացնելու համար աջակցություն կարող եք ստանալ նույն վարչություններում։

Մարզ	Մարզկենտրոն
Արագածոտն	Աշտարակ
Արարատ	Արտաշատ
Արմավիր	Արմավիր
Գեղարքունիք	Գավառ
Լոռի	Վանաձոր
Կոտայք	Հրազդան
Շիրակ	Գյումրի
Սյունիք	Կապան
Վայոց ձոր	Եղեգնաձոր
Տավուշ	Իջևան

 

5. Հնարավոր է արդյո՞ք շահառուին զրկել հատուցումից։

Ոչ, Հիմնադրամն իրավունք չունի շահառուին զրկել իր հատուցումից։

6.Կարո՞ղ է շահառուն հրաժարվել հատուցումից հօգուտ այլ շահառուի։

Ոչ, յուրաքանչյուր շահառու ստանում է իր հատուցումը։ Ստանլուց հետո ինքն է որոշում ինչպես վարվել:

7. Ի՞նչ անել, եթե հայրության փաստը հավաստող փաստաթուղթ չկա։

Հարկավոր է դիմել դատարան՝ հայրությունը ճանաչելու նպատակով։

Հանրային պաշտպանի գրասենյակը տրամադրում է անվճար իրավական աջակցություն է (հեռ. +37410 600 713)։ 

8. Ի՞նչ անել, եթե շահառուները համաձայնության չեն գալիս, թե ում պետք է վճարվի հատուցումը։

Յուրաքանչյուր շահառուի անունով բացվում է առանձին հաշվեհամար։ Գումարը հավասարաչափ բաշխվում է շահառուների միջև։ Մինչև 18 տարեկան երեխաների բաժինը հիմնականում հատկացվում է մորը։ 

9. Շահառուներից մեկի գտնվելու վայրն անհայտ է, ի՞նչ անել։

Հիմնադրամը վճարում է մյուս շահառուների մասնաբաժինները, և 6 ամիս սպասում տվյալ շահառուի հայտնվելուն։ Եթե 6 ամսվա ընթացքում շահառուն չի հայտնաբերվում, նրա մասնաբաժինը բաշխվում է մյուս շահառուների միջև։ Եթե այնուամենայնիվ, տարիներ անց նա հայտնվի, ապա կստանա ամսական վճարումների իր մասնաբաժինը։ 

10. Զոհված զինվորի կինը հղի է։

Չծնված երեխան նույնպես շահառու է։  Հարկավոր է դիմել դատարան՝ հայրությունը ճանաչելու նպատակով։

11. Հնարավո՞ր է կրկնվի Համահայկական հիմնադրամի պատմությունը։

«Զինծառայողների ապահովագրության» հիմնադրամ մտնող բոլոր դրամական միջոցները ծառայում են միմիայն մեկ նպատակի՝ ապահովել զինվորի կամ նրա ընտանիքի բարօրրությունը։

Ցանկացած պահի կարելի է մտնել կայք և տեսնել Հիմնադրամի կողմից հավաքագրված միջոցների և իրականացված հատուցումների չափը:

Թափանցիկությունն ու հաշվետվողականությունը մեզ համար կարևորագույն արժեքներ են:

12. Անհետ կորածների ընտանիքները հատուցվու՞մ են։

Այո։ Հարկավոր է 2021 թվականի փետրվարի 10-ից հետո դիմել դատարան՝ անձին ճանաչել անհայտ կորած։ Անհետ կորած ճանաչելու մասին դատարանի որոշումից հետո հետևել հարց 4-ի պատասխաններին։

13. Ո՞վ է տրամադրում հաշմանդամության կարգ։

Հաշմանդամության կարգը տրամադրվում է իրավասու պետական մարմնի կողմից բժշկասոցիալական փորձաքննության արդյունքների հիման վրա, որի հետ Հիմնադրամը որևէ առնչություն չունի։ Մանրամասներին կարող եք ծանոթանալ՝ հղումով:

14. Ո՞վ կարող է ստանալ 100,000 դրամ հավելավճար։

Զինծառայողը կամ նրա ընտանիքի անդամներն ունեն լրացուցիչ ամսական 100,000 դրամ ստանալու իրավունք, եթե հատուցման ժամանակ զինծառայողն ունի երեք կամ ավելի զավակներ, ովքեր

• չեն բոլորել 18 տարին, կամ
• 23 տարին չլրացածցերեկային ուսուցմամբ սովորողներ են, կամ
• հաշմանդամություն ունեն և հաշմանդամության կարգը ստացել են մինչև 18 տարին լրանալը։

Ամսական լրացուցիչ 100,000 դրամ ստանալու իրավունք ունեցող շահառուն հատուցում ստանալու մասին դիմում ներկայացնելու հետ մեկտեղ, պետք է ներկայացնի նաև ամսական լրացուցիչ գումար ստանալու դիմում: 

15. Կամավորները հատուցվելո՞ւ են։

Եթե կամավորը պաշտոնապես զորակցվել է, ապա՝ այո։ Եթե ոչ, ապա խնդրում ենք դիմել Պաշտպանության նախարարություն։

16. Ինչպե՞ս են հատուցվում 2017 թվականից առաջ տեղի ունեցած դեպքերը։

2008-2016 թվականների շահառուներին տրամադրվում է միայն ամսական փոխհատուցումներ։ Հաշվարկված ամսական վճարի գումարից հանվում է պետության կողմից փաստացի տրամադրվող կենսաթոշակի գումարի չափը ու հիմնադրամի կողմից տրվում տարբերությունը։ Օրինակ, եթե շահառուները պետությունից փաստացի ստանում են 60,000 դրամ և Հիմնադրամի կողմից հատուցվելիք գումարը 200,000 դրամ է, ապա Հիմնադրամը փաստացի կվճարի տարբերությունը` 140,000 դրամ:

17. Ո՞ւմ է հատուցումներ տրամադրում հիմնադրամը 2020 թվականի պատերազմից հետո։

2020 թվականի պատերազմից հետո Հիմնադրամը հատուցումներ է տրամադրում`

• յուրաքանչյուր զինծառայողի, որը ճանաչվել է 1-ին կամ 2-րդ խմբի հաշմանդամ,
• զոհված կամ դատական ակտով անհայտ բացակայող ճանաչված յուրաքանչյուր զինծառայողի ընտանիքին։

18. Ո՞վքեր են զինծառայողի ընտանիքի շահառուները։

• զինծառայողի ամուսինը,
• զինծառայողի զավակ(ներ)ը,
• զինծառայողի ծնող(ներ)ը։

19. Որո՞նք են տրամադրվող հատուցման չափերը։

Զոհված և անհայտ կորած զինծառայողների ընտանիքները և 1-ին կարգի հաշմանդամություն ձեռք բերած զինծառայողները ստանում են միանվագ փոխհատուցում 10 միլիոն դրամի չափով և այնուհետև 20 տարի շարունակ` ամսական 200,000 – 300,000 դրամ։

2-րդ կարգի հաշմանդամություն ստացած զինծառայողները ստանում են միանվագ 5 միլիոն դրամ ու կրկին 20 տարի շարունակ` ամսական 100,000 – 200,000 դրամ։

20. Իրավական խնդիրների դեպքում ու՞ր դիմել։

Բարդ ամուսնաընտանեկան հարաբերություններ ունեցող շահառուներին անվճար իրավական աջակցություն է ցուցաբերում Հանրային պաշտպանի գրասենյակը (հեռ. +37410 600 713)։

21. Ո՞ր դեպքերը չեն հատուցմում։

Հատուցման դեպք չի համարվում, երբ զինծառայողը զոհվել կամ հաշմանդամություն է ձեռք բերել ոչ մարտական գործողությունների արդյունքում։